الحقيقة المرة

الغريب انو لما بتحكي الحقيقة واللي كل الناس بتعرفها بس مش جايي على بالهم يسمعوها بقولوا عنك انك انسان بتنق والعجب ما بيعجبك ولا الصيام برجب، ما بعرف ليش الانسان بحب يكذب عاحالو تا يوهم نفسو انو سعيد ومبسوط، وهوي بيعرف انو كذاب، ولما بتجي بتضوي عالمشكلة القيامة بتقوم وما بتقعد، وبقولولك طول بالك وخذ فنجان قهوة وسيكارة وهدي اعصابك وعيد حساباتك بس لانو الموضوع مش عاجبهم او ما بدهم يعترفوا انو صحيح، اذا قلت عن الاعور اعور بقولولك ليش شايف نص الكباية الفاضية هيدا الانسان بيقشع نشكر الله ، طيب مزبوط بيقشع بس بعين واحدة يعني عندو مشكلة، او اذا قلت انو فلان مات واحد من اولاده وهوي حزين كتير وما عم يقدر يتصبر بيسألوك عندو غيرو ويا ويلك اذا قلت ايه بيصرخوا عليك العمى شو بتنق ما بتجيب خبر حلو هيدا بدل ما يشكر الله انو مات ولد واحد وبعد عندو غيرو قاعد عم يبكي يروح يشوف غيرو ماتوا كل اولادوا وبعدو احسن منو ،
يا جماعة منعرف انو مصيبتو اخف من غيرو بس الزلمة خسر ابنو مش من حقو يبكي عليه؟ وبعدين كل واحد الو مطرح وما حدا بعبي مطرح حدا واللي فقد كل اولادو اكيد انو مصيبتو افظع بس لازم نعرف انو المصايب ما بتنقاس بالنسبة للشخص على انو غيرو مصيبتو اكبر هوي بيعرف بس عاطفتو وخسارتو بتخليه يشوف انو هوي اكتر واحد بالعالم خسران
يعني المقصود انو لما منشوف واحد عم يشكي من تعبو ما نزيد عليه ، ولما منشوف انسان عم يبكي عا فقيدو ما نظلمو ونجرحوا ونقول ايه وين بعدك فلان مصيبتو اكبر من مصيبتك ومش عامل متلك ، او لما منشوف انسان عم يشكي فقدان العدل ما نقلوا منيح ما هيي خسارتك اكبر من هيك بالمال ولا باصحابو ، كل هالحكي اوقات كتيرة بيجرح وما بداوي، ولا مرة كان الدوا متل ما بقولو الكي لانو آخر شي بيلجأولو لما بتنعدم عندن كل الفرص منشان هيك مانو دوا ، هوي مغامرة وتجربة فما نجرب نظرياتنا بالناس ونوقف نتفرج عا اوجاعهم ان قدرنا نساعد ونداوي كان بها ما قدرنا اشرف النا انو نوقف عالحياد من انو نمسك السكين ونذبح فيها كل واحد قال آخ ونوعظو ونقول له انت انسان بتعبد شي اسمو النق عض عا جرحك واسكت لانو ما حدا طالع عا بالو ينغم ويزعل ، نحن مش جايين عالدنيا 100000 مرة نحن جايين مرة واحدة وبدنا نفرح، فيا صاحب الهموم اصبر ويا موجوع اصبر ويا محزونن اصبر لانو ما حدا بدو يبكي معك ولا ينوجع معك ولا ينهم معك ، الاصح انو ما حدا بدو وجودك